Кыргыз Республикасынын Көз карандысыздыгынын 34 жылдыгына карата Жалал-Абад шаарында айыл өкмөттөрүнө 178 кызматтык унааны өткөрүп берүү салтанаттуу аземи болуп өттү. Иш-чарага Кыргыз Республикасынын Президенти катышты.
Айыл өкмөттөрүнө Chevrolet Tracker жана Нива маркасындагы кызматтык унаалар берилди. Бул унаалар Мамлекеттик лизинг компаниясы ишке ашырып жаткан мамлекеттик лизинг программасынын алкагында өткөрүлүп берилди.
Программанын негизги максаты — жергиликтүү өз алдынча башкаруу органдарынын материалдык-техникалык базасын чыңдоо, алардын мобилдүүлүгүн жана аймактардагы ишинин натыйжалуулугун жогорулатуу. Заманбап кызматтык унаалардын болушу айыл өкмөттөрүнө калкка кызмат көрсөтүүнү ыкчам жана сапаттуу жүргүзүүгө, социалдык жана чарбалык маселелерди өз убагында чечүүгө мүмкүнчүлүк берет.
Мамлекеттик лизинг компаниясы мамлекеттик приоритеттүү программаларды ишке ашыруу жана региондорду колдоо максатында түзүлгөн. Алты ай ичинде компания бир катар ири долбоорлорду, анын ичинде мамлекеттик органдар үчүн айыл чарба техникасын жана автотранспортту өткөрүп берүүнү ишке ашырды.
«Биздин негизги максат — мамлекеттик органдар жана жергиликтүү өз алдынча башкаруу органдары заманбап техниканы жеткиликтүү шарттарда ала алышы үчүн шарт түзүү. Лизинг — бул негизги каражаттарды бир жолку чоң чыгымсыз жаңылоонун эффективдүү куралы», — деп белгилешти Мамлекеттик лизинг компаниясында.
Айыл өкмөттөрүнө кызматтык унааларды өткөрүп берүү региондордун инфраструктурасын өнүктүрүүдөгү маанилүү кадам болуп, мамлекеттик колдоонун практикалык далили болуп эсептелет. Мындан ары компания бардык аймактарды камтып, мамлекеттик органдарды зарыл болгон техника менен камсыздоо долбоорлорун улантат.
