Аймактарда заманбап техника пайда болгондо, коммуналдык кызматтардын иши гана өзгөрбөстөн, адамдардын жашоо сапаты да жакшырат.
2025-жылы «Мамлекеттик лизинг компаниясы» ААКсы тарабынан Күн-Чыгыш айыл өкмөтүнө лизинг механизми аркылуу атайын техникалар: таштанды ташуучу унаа, экскаватор жана автовышка берилген.
Бүгүнкү күндө бул техникалар Бөкөнбаев, Арчалы, Ак-Булуң, Кажы-Саз, Кажы-Сай жана Тон айылдарын камтыган 6 калктуу конушту тейлеп жатат. Аймакта 21 миңден ашуун калк жашайт. Күн сайын 20 тоннага чейин таштанды чыгарылып, көптөгөн инфраструктуралык иштер өз күчү менен аткарылууда.
Мурда таштанды чыгаруу үчүн бир нече каттам жасалып, кошумча чыгымдар жаралса, азыр иштер ыкчам, натыйжалуу жана аз чыгым менен аткарылууда.
Көпчүлүк аймактар үчүн техникалык базаны жаңылоо дагы эле олуттуу маселе бойдон калууда. Ошондуктан ГЛК элдин жашоо сапатына, инфраструктуранын өнүгүшүнө жана аймактардын туруктуу өсүшүнө түздөн-түз таасир берген долбоорлорду ишке ашырууда.
Ар бир мындай долбоордун артында жөн гана техника эмес, адамдардын күнүмдүк жашоосундагы реалдуу өзгөрүүлөр турат.
Таза көчөлөр, үзгүлтүксүз иштеген коммуналдык кызматтар жана эл күн сайын көрүп жаткан оң натыйжалар — мунун баары жүргүзүлүп жаткан иштердин жыйынтыгы.
Натыйжа:
-коммуналдык кызматтардын сапаты жакшырды;
-убакыт жана чыгымдар кыскарды;
-иштердин ыкчамдыгы жогорулады;
-аймактардын тазалыгы жана экологиялык абалы жакшырды.
